Вработените и учениците во ОУ „Св. Кирил и Методиј“ од Кочани денеска го одбележаа патрониот празник.
Во рамки на прославата, во училишниот хол се одржа пригодна свеченост на која беа доделени признанијата за најдобрите ученици во изминатата година.
Кратко поздравно обраќање пред присутните ученици, вработени и гости имаше директорот Драјган Трајчев, кој нагласи дека одбележувањето на празникот годинава е скромно поради трагедијата што го погоди Кочани, по што повика на едноминутен молк во знак на почит кон настраданите.
-Како професор по историја, една од омилените наставни единици што ја предавав цели четири часа, беше токму посветеноста на животот, делото и значењето на светите браќа Кирил и Методиј. Денеска нема да говорам за нив, туку ќе им се обратам на оние кои ја продолжија оваа нивна мисионерска дејност, а тоа се моите колеги. Знаете дека секој ден во образованието е нов предизвик, знам дека ја работите најтешката, но и најубавата работа на светот. Доказ за тоа се овие прекрасни деца кои во текот на оваа учебна година освоија огромен број награди, со први, втори и трети места на општински, регионални и државни натпревари по математика, природни науки, информатика, англиски јазик, како и на ликовни и литературни конкурси. Ученици, продолжете така, на вистинскиот пат сте, истакна Трајчев.
Пофалници за постигнатиот успех добија тројца ученици, а за првенец на генерацијата беше прогласена деветодделенката Матеа Глигорова.
-Наставниците од ова училиште секогаш нѐ поттикнуваа да ги следиме нашите соништа и вредно да работиме за да ги постигнеме. Секој ден поминат во ова училиште беше нова можност за учење и докажување. Зад секој ученик стојат луѓе кои веруваат во него, го поддржуваат и го бодрат. Со оваа награда завршувам едно поглавје од мојот живот, спремна да постигнувам нови успеси во наредните, истакна Глигорова.
Во рамки на прославата на патрониот празник, на споменикот на словенските просветители во дворот на училиштето што го носи нивното име, ученици, вработени и други гости положија букети свежо цвеќе. Притоа им оддадоа почит за нивниот придонес во создавањето на првата словенската азбука и за ширењето на писменоста во целиот источен регион од Европа.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
