Нема да се откажеме од протестите и ќе маршираме сѐ додека не биде задоволена правдата за нашите деца и затоа бараме виновниците што побрзо да бидат казнети, порачаа родителите на починатите во „Пулс“ на денешниот 15. „Марш за ангелите“.
Присутните на маршот, кои тргнаа од Паркот на Револуцијата и поминаа низ Трговскиот центар, запреа пред зградата на Општина Кочани каде упатија порака дека погрешна била намерата за одбележување на празникот Петровден со забавно-музичка програма.
-Пред четири месеци убијците во Kочани убија 62 дечиња и повредија 200 и вие организирате веселба. Кој во Кочани ќе се весели кога нема човек, односно фамилија која не ја завиена во црн? Господине градоначалник, големината на еден човек е во тоа да грешниот, па затоа ние како чесни луѓе, кои еве веќе четири месеци правиме марш секоја сабота, ви простуваме за вашата грешка, а можеби и не е ваша, можеби некој ве наговорил на ова, но вие несвесно сте го сториле ова срамно дело. И на крај, ве замолуваме да не оставите на мир и вие од СДСМ и вие од ВМРО, ние сме чесни луѓе, немојте на нашата болка и тага да си правите политички маркетинг. Оставете нѐ на мира зашто трпението е при крај, истакна Драги Стојанов, родител чиј син единец почина во трагедијата.
Колоната се упати кон Полициската станица каде со свирежи и извици повторно беше искажано незадоволството од постапувањето на полициските службеници во критичната ноќ кога се случи пожарот.
Пред зградата на Јавното обвинителство и Основниот суд родителите на починатите деца нагласија дека очекуваат правично судење. За демантот од Владата со кој се негираше дека им било порачано да определат цена за нивните деца, мајките рекоа дека не лажат во своите тврдења.
-Ние родителите сме од крв и од месо како, што беа и нашите деца, ние се бориме за правда, не за политички партии или за било што. Значи, ако јавноста на обвинува нас или било кој од родителите, ние не лажеме. Ние сме од крв и од месо и еден ден сакаме да идеме горе, кај децата, сме тргнале по божјиот пат, како што ги учевме и нашите деца да бидат побожни, така и ние продолжуваме по божјиот пат одиме напред за да бидеме еден ден со нив во рајот. Затоа ние не лажеме, прашајте кој сакате од родителите дали имаме смелост да лажеме. Целта ни е таа, еден ден кога ќе отидеме кај нив да им речеме деца наши, благодариме што сте чеда божји и ние сме дел со вас, дека сме ја докажале правдата, а правдата како што гледам нема да излезе ништо на виделина. Секој сака само да нѐ нагази уште повеќе и да нѐ понижи како родители, истакна Габриела Наунова, мајка чија ќерка почина во „Пулс“.
-Треба да знаат дека ние не сме партиски определени, ни од СДСМ, ни од ВМРО, ни од ДУИ, ни од Левица, ни од никој. И да не нѐ препукуваат по коментарите,одете овој ќе ви даде пари, оној ќе ви даде пари, нашите деца со пари не ги враќаме, со парите ништо не се купува, пари има – децата ни ги нема. Џабе ни е сѐ на нас, на нас парите не ни требаат, ни требаа децата да ни бидат живи и здрави и прави. Благодарение на УЈП што викале дека има три врати, а тоа е една и единствена на 80 сантиметри, значи благодарение на нив, што ја плаќаат глобата на некои што ги ставаат на функции, и немој да мислат дека над мртвите деца кариера ќе градат, нема да ја градат кариерата, истакна Васка Стојанова чиј син единец почина во „Пулс“.
Пред Основниот суд во Кочани родителите уште еднаш упатија порака до судиите кои ќе го водат судскиот процес дека очекуваат правично судење и правда за своите деца.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
