Во основното училиште „Св. Кирил и Методиј“ од Кочани во тек се градежни активности за промена на постојната кровна конструкција, со термичка и хидроизолација на поткровниот дел.
Се обновува кровна површина од околу 900 квадратни метри, а се поставуваат нова инсталација за одвод на атмосферска вода и заштита од атмосферски влијанија врз носечката дрвена повеќводна конструкција.
Реконструкцијата се реализира со средства од буџетот на Министерството за образование и наука, во рамки на јавниот повик за финансирање проекти за изградба и реконструкција, по апликацијата што ја достави Општина Кочани.
-Се отстрануваат старите ќерамиди, како и делот на којшто имаше лимен кров. Се поставува целосно нова носечка конструкција, дополнета со хидротермичка изолација и повторно лим како завршен слој. Градежните работи ги изведува компанијата „Промонтинг“ од Скопје, а целиот проект е со вредност од околу 11,7 милиони денари. Со неговото завршување значително ќе ги подобриме просторните услови што ќе овозможи и поквалитетен и поефикасен образовен процес, истакна Христина Симова Јовановска, директорка на ОУ „Св. Кирил и Методиј“.
Кровот во најголемото основно училиште во Кочани, поставен пред повеќе децении, протекуваше и имаше оштетувања на внатрешните простории и инвентарот.
Обврска на изведувачот е градежните работи за реконструкцијата да ги комплетира во период од девет месеци.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
