Општина Кочани денеска официјално го објави јавниот повик за доставување предлози за доделување на највисоките општински признанија.
Со овој повик, Локалната самоуправа има за цел да ги одликува поединците и колективите кои оставиле траен белег во развојот и промоцијата на градот, за што доделува Награда за значајни остварувања и престижната Награда за животно дело.
Наградата за значајни остварувања за развојот на општината е наменета за широк круг субјекти. За неа можат да бидат предложени поединци, групи творци, екипи, установи, трговски друштва и здруженија на граѓани.
Наградата за животно дело се смета за највисок степен на општествено признание во општината. Таа се доделува за исклучителни резултати и врвни остварувања во неколку клучни области: науката, иноваторството, уметноста, стопанството и во други дејности од јавен интерес. Конечната одлука за добитниците ја носи Одборот за доделување награди на Општина Кочани, по претходна оцена на пристигнатите предлози.
Двете општински награди се доделуваат во форма на плакета.
Процесот на прибирање предлози е веќе отворен и трае до 25 август, при што тие треба да се достават до Одборот за доделување награди на адреса на Општина Кочани, ул. „Раде Кратовче“ бр. 1.
Од Општината потенцираат дека сите предлози за доделување на наградите мора да бидат соодветно и детално образложени, со цел Комисијата да има јасен увид во придонесот на номинираните кандидати.
Овие награди традиционално се доделуваат во рамките на свеченостите по повод 7 Септември – Денот на Општина Кочани, како поттик за понатамошно творештво и општествена одговорност на сите граѓани.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
