По повод 5 Јуни, Светскиот ден на животната средина, во основното училиште „Св. Кирил и Методиј“ во Кочани денеска се одржа координирана акција за собирање и селектирање на текстилен отпад.
Настанот, организиран во соработка со Општина Кочани и Здружението „Синтезис“, имаше за цел да ја подигне јавната свест за правилното управување со овој специфичен вид отпад.
Во акцијата активно се вклучија учениците, но и граѓаните кои имаа можност да ја одложат својата неупотреблива облека во специјалниот контејнер поставен во училиштето.
-Собираме текстилен отпад и го селектираме за понатамошно рециклирање. Во нашето училиште веќе постои специјален контејнер. Не само учениците, може било кој од граѓаните да дојде и да го одложи својот текстилен отпад за кој нема веќе намена. Училиштето било и нека остане двигател на општествените промени. Оваа акција е практична примена на она што учениците теоретски го учат во рамките на наставните предмети, истакна Љубица Теодосиева, наставничка во ОУ „Св. Кирил и Методиј“, при што упати и благодарност до Здружението „Синтезис“ и компанијата „Екотекс Фирус“ – Скопје за овозможувањето на овој процес.
Од страна на Локалната самоуправа, поддршката за ваквите иницијативи ја потврди Даниел Стојанов, раководител на Одделението за комунални работи во Општина Кочани. Тој нагласи дека ваквите акции спречуваат текстилот да заврши на несоодветни места.
-Ние како Општина секогаш стоиме зад вакви акции и сметам дека денешната акција е успешно завршена од страна на дечињата. Среќни сме што овој отпад од текстил нема да заврши на несоодветни места, односно да се измеша со останатиот комунален смет, туку ќе заврши на одредени места каде посебно ќе се рециклира и еден ден повторно ќе биде во употреба, истакна Стојанов.
Кристина Димитрова од Здружението „Синтезис“ ја поврза денешната акција со поширокиот проект „Ракотворница“, кој веќе два месеци се реализира во Кочани.
-Оваа акција е дел од проектот ‘Ракотворница’ што се реализира изминатите два месеца во Етнокуќата, чиј прв дел беше посветен на обука за ткаење од материјали од облека и ткаенини кои повеќе не се употребуваат, а преку процесот добија нова форма и вредност, нагласи Димитрова.
Димитрова упати и јавна покана до сите граѓани да ја посетат Етнокуќата, за да ги видат финалните производи кои членовите на здружението ги создале од рециклиран материјал.
За потсетување, од април оваа година во Кочани се поставени контејнери за текстилен отпад на вкупно 10 локации низ градот, со што на граѓаните им е олеснето правилното селектирање.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
