Со преку 3.500 вработени, нови инвестиции во автоматизација и проширување на капацитетите, како и со серија хуманитарни и инфраструктурни донации за Кочани, компанијата „Амфенол Технолоџи Македонија“ го одбележува својот 13-ти роденден.
По тој повод, в недела, на 18 октомври во кругот на компанијата ќе се одржи целодневна прослава за вработените и нивните семејства.
Генералниот директор на компанијата, Сашко Наков, се осврна на досегашните предизвици и на остварениот развој.
-Октомври е месец кога се потсетуваме на почетоците во ‘Амфенол Технолоџи Македонија’. Во октомври 2013 ги почнавме нашите први активности и нашето производство и веќе 13 години успешно делуваме во Кочани и во овој регион. Можам со задоволство да констатирам дека веќе имаме преку 3.500 вработени, сме меѓу најголемите компании во државата и се надевам дека регионот го чувствува бенефитот од нашето присуство. Го зголемивме нашето присуство во повеќе општини, а од оваа година обезбедивме и организиран транспорт за вработените од Свети Николе и Штип со околината, рече Наков.
Говорејќи за идните планови и инвестиции, тој ја најави изградбата на новиот производствен простор и процесот на автоматизација со роботика.
-Во постапка сме за почеток на градба на нова зграда на автомобилскиот дел. Првата фаза опфаќа околу 1.600 квадрати, а веднаш потоа следи втората фаза со дополнителни 3.000 квадрати, со што за наредниот период имаме обезбедено простор, проекти и развој. Последните објекти се со високо автоматизирана опрема и роботи, каде што ни се потребни луѓе со посебни вештини и знаења. За таа цел перманентно доаѓаат експерти од Германија и Швајцарија за размена на искуства и обука за нашите луѓе, додаде Наков.
Покрај развојот на производството, генералниот директор ги истакна и општествено одговорните проекти што компанијата ги реализира за Кочани.
-Оваа година имаме одвоено сериозна сума за донации на локалната самоуправа. Меѓу другото, донираме комплетна опрема со боци со кислород за Територијалната противпожарна единица во Кочани за да можат да делуваат и во најтешки услови. Исто така, реализираме проекти за автобуски постојки, приклучен пат пред село Тркање во соработка со општината, уредување кај детската градинка, засадување на 63 садници и летниковци кај Лукоил, како и донација за Дневниот центар за лица со попреченост. Се одлучивме за повеќе донации кои претставуваат сериозна поддршка за подобрување на начинот на живот во овој регион, истакна Наков.
Наков додаде дека компанијата потпиша и меморандум за соработка со техничкото средно училиште „Гошо Викентиев“ во Кочани за практикантска работа на младите кадри, а во рамките на десетте бизнис единици се планира раст и во 2027 година.
Празничната агенда и доделувањето на јубилејните признанија ги најави Валентина Зафироска, вработена во компанијата.
-13 години заедно, 13 години успех, посветеност и раст. Во недела, на 18 октомври, компанијата ќе го одбележи својот 13-ти роденден со прослава во кругот на компанијата, исполнета со спорт, дружење и забава. Најпрвин традиционално ќе се одржи фудбалски натпревар меѓу екипите од сите производствени единици, а програмата е збогатена и со мала олимпијада. Посебно внимание ќе им биде посветено на 276 вработени кои одбележуваат 5 години јубилеј, со пригодни награди и прослава со нивните најблиски. Вечерта ќе биде посветена на големиот јубилеј за 10 години посветеност на 226 вработени кои со својот труд, енергија и време дадоа значаен придонес во развојот на компанијата. 13 години успешно работење на ‘Амфенол’ е приказна создадена од луѓето, нашите вработени, истакна Зафироска.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
