Македонската боречка федерација ги прогласи најдобрите борачи, тренери и спортски работници во борењето за 2023 година, а во конкуренција за признанијата се најдоа сите клубови од државата.
Свеченоста за прогласувањето и доделувањето на наградите се одржа во Прилеп, а домаќин беше боречкиот клуб „7 Мај“, кој годинава екипно е освојувач на шампионската титула во женска конкуренција.
Признанијата на најдобрите им припаднаа според постигнатите резултати на домашните и меѓународни натпреварувања, во сениорска и младинска конкуренција.
Меѓу наградените се најдоа и кочанските борачи и боречки судии, кои се актуелни или поранешни членови на БК „Спартак“. Во младинска конкуренција, кај генерацијата У15 признанија добија Даријан Павлев, Славица Митеа и Стојана Митева. Во екипна конкуренција, меѓу 20 клубови, „Спартак“ се најде на 7 позиција со освоени вкупно 50 бода.
На свеченоста во Прилеп, претседателот на Федерацијата, Дејан Богданов им додели признанија на четворица боречки судии, а меѓу нив се најдоа и Гоце Ангелов и Игор Христов, кои се поранешни борачи на кочанскиот клуб.
Боречката федерација им додели признанија и на осум медиуми кои редовно известуваат за постигнувањата и работата на сојузот и клубовите, а меѓу нив се најдоа ТВ Канал 8 и порталите Гласно, Комарец и Ипон.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
