Граѓаните кои во четвртокот почнаа со протест против загадувањето од комуналната депонија кај Бели, во петокот го продолжија собирот на крстосницата кон селото, на регионалниот пат кон Пониква, изразувајќи револт што надлежните не преземаат соодветни активности за решавање на проблемот.
На протестот се придружија жители и претставници од Месната заедница од Бели, кои нагласија дека состојбата со загадениот воздух е неиздржлива затоа што чадот од запалената депонија им влегува директно во домовите. Забележале дека на депонијата се донесува отпад и од соседните општини, а на просторот каде се депонира ѓубрето престојуваат лица кои неовластено го пребаруваат и палат.
На протестот беше заклучено дека неопходни се посериозни активности, за да ги натераат надлежните да преземат мерки што ќе дадат позитивни и долгорочни резултати.
-По телефонски разговор со лица од комуналното претпријатие дојдовме до сознание дека нашите и нивните ставови се во ист правец, односно дека на депонијата треба да се воведе контролиран влез и излез со физичко обезбедување и да се постави видео надзор. Тоа е првата работа, а втората е дека треба под итно да се третира со алги, што во минатотот се покажаа како добра практика, сето тоа да биде континуирано, перманентно, според количината на отпадот. Не можеме да дозволиме ако ја изгаснеме сега, после еден месец или два да ни се повтори истата слика, истакна Златко Илијев, учесник на протестот.
Граѓаните најавија дека протестите ќе ги продолжат, со сериозно размислување да ги радикализираат. Оценија дека протестите против загадувањето од „Пејпар мил“ после долга и континуирана активност дале резултати, поради што истите методи ќе се применуваат и во овој случај.
-Ппанираме да ги преместиме протестите во градот, на тој начин ќе бидеме побројни и повидливи, за да оствариме официјална средба со раководните лица на КЈП „Водовод“, како и со надлежните од Локалната самоуправа и од Министерството за животна средина, додаде Илијев.
Како можна радикализација на протестите беше предложено да се ангажира приватна агенција за обезбедување која ќе го контролира влегувањето на депонијата и ќе спречи неовластеното пребарување и палење на ѓубриштето.
Присутните на протестот нагласија дека комуналната депонија кај Бели е нелегална, без соодветна урбанистичка документација и дозвола за намената, иако со децении локацијата се користи за одлагање на отпадот.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
