Градоначалникот на Општина Кочани, Владко Грозданов, денеска одржа прес-конференција со цел да ја информира јавноста за тековната ситуација поврзана со барањето за разрешување на директорот на основното училиште „Никола Карев“.
Оваа реакција доаѓа по претходно одржаниот прес на советничката група „Доста беше“ од Советот на Општината.
Во своето воведно излагање, градоначалникот Грозданов нагласи дека неговата работа се темели на принципите на чесност и почитување на законите.
-Со самото стапување на функцијата градоначалник на општина Кочани се обврзав и пред вас и пред себе дека ќе работам согласно законските правила и прописи во Република Македонија и дека ќе го почитувам законот во целост. Исто така сакам да истакнам дека иако е премногу обемен самиот процес во општината, премногу ситуации се тековни, кај мене предметите не стојат во фиока, постапувам чесно, домаќински и одговорно, рече Грозданов.
Градоначалникот детално ја објасни хронологијата на настаните, потенцирајќи дека по добивањето на барањето за разрешување на 4-ти март 2026 година, веднаш била побарана консултација со стручните служби. Клучниот момент во постапката е мислењето од Државната комисија за спречување на корупција (ДКСК), кое пристигнало на почетокот на април.
-На 14. април Државната комисија за спречување на корупција до градоначалникот на општина Кочани достави ново известување во кое се бара градоначалникот да постапи согласно законските правила и прописи, т.е. да го разреши директорот или директорот доброволно да си даде своја оставка од функцијата која ја извршува во моментот. На 21.04 од страна на градоначалникот на општина Кочани беше испратено до директорот на општинското основно училиште Никола Карев – Кочани известување во кое се изнесува комплетното мислење од страна на Државната комисија за спречување на корупција и побарав од директорот во примерен рок сам да постапи согласно законските правила и прописи, додаде градоначалникот.
Иако одговорот бил делумно одолговлечен поради процеси на интегрална контрола, Грозданов потврди дека училишниот одбор и директорот се запознаени со барањето. Тој најави дека конечната разрешница на овој случај се очекува уште во текот на денешниот ден.
Во однос на прашањето за потенцијалниот наследник на функцијата, градоначалникот појасни дека сè уште нема конкретно име, бидејќи тоа зависи од законските процедури за избор на вршител на должност – директор.
-Новото име не го знаеме бидејќи како што ви спомнав и за ВД директор треба да биде назначен човек кој има положен директорски испит. Но во законот постои една точка која вели дека доколку во училиштето нема лице кое има положен директорски испит, за ВД директор на училиштето ќе биде назначен вработен од самото училиште, рече градоначалникот Грозданов.
Грозданов исто така напомена дека останува на самиот актуелен директор да одлучи дали ќе се повлече од директорската функција или пак ќе го заврши својот мандат како член во Советот на Општина Кочани поради правилата за неспоивост.
Советничката група „Доста беше“ утрово одржала прес-конференција на која тема бил случајот со директорот на „Никола Карев“, но КАНАЛ 8 како медиум не беше поканет. Иако од советничката група им се извиниле на медиумите затоа што последен пат наместо прес за новинарите во Кочани, одржале пред колегите во Штип, сепак очигледно е дека начинот на организирање прес-конференции сѐ уште не им е добро совладана лекција.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
