Општина Кочани ја одржа јавната расправа за прибирање предлози од граѓаните за креирање на општинскиот буџет за 2024 година. Таквото консултирање со јавноста е законска обврска за локалната власт при процесот на буџетско планирање.
Полната сала на Мултикултурниот центар ја покажа заинтересираноста на граѓаните јавно да ги предочат проблемите од нивната непосредна околина и да побараат што поскоро да бидат решени.
По искористената можност да бидат консултирани жителите на Кочани ќе очекуваат реконструкција на нивните улици, запирање на водата која често се излева од шахтите, пробивање на полски патишта, поредовно одржување на комуналната хигиена и слично. Повеќето од изнесените барања можеа да слушнат и на сличните јавни расправи во претходните години. Без разлика дали се во градот или во населените места на општината, тие се повторуваат со слична тематика.
-Немаме нови барања, освен да ги повторуваме истите и претходно што сме ги имале. Би нагласила едно од барањата, односно од предлозите, довршување на канализацијата. Да се најде начин, можност и средства во буџетот, затоа што тоа беше ветено и уште не е реализирано. Дел од мрежата е реализиран но уште не е во функција. Да добиеме информација кога ќе биде во функција и да се приклучуваме на неа, барем онаму каде што веќе се постави. Тоа ни е клучно барање, а следното, повторно, е обновување на водоводната мрежа. Буквално секојдневно кај нас се интервенира, а водоводната мрежа во горниот дел на селото е катастрофална. Се копа на секои десетина-петнаесет метри, застарена мрежа што тѕреба да се обнови, истакна Латинка Постолова, претседателка на Месната заедница – Тркање.
Точно по две години од преземањето на власта, актуелното општинско раководство истакна дека мислењата и барањата на граѓаните се важни за буџетското планирање. Сепак, прашање е колку од нив реално можат да се релизираат.
И покрај долгиот список инфраструктурни потреби изнесени од граѓаните на јавната расправа за новиот нацрт-буџет, малкумина од присутните отворија проблеми од поширок обем што сериозно го засегаат функционирањето во урбаната средина. На расправата останаа недопрени прашањата за Градскиот пазар, проблемот со паркирањето и катната гаража, ниту за сопственост и состојбата на Ловниот дом во Кочани, што укажува на пример за неодоговорно и лошо стопанисување на Општината со сопствениот имот. Дополнително, во никаков контекст не се спомна ниту изградбата на јужниот булеварски влез во Кочани.
На одржаната јавна расправа за планирањата на буџетот за следната година, ветувањата на општинското раководство повторно беа ставени во општата рамка – ќе се направи колку што се може.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
