Подрачното одделение на Дирекцијата за заштита и спасување (ДЗС) во Кочани останува без ниту еден назначен инспектор, што претставува сериозна празнина во превенцијата и контролата на заштитата од пожари на локално ниво.
Иста е состојбата и во соседните општини од Источниот регион каде што подрачните одделенија во Делчево, Штип, Радовиш и Свети Николе исто така имаат нула инспектори.
Според податоците од официјалниот ревизорски извештај на Државниот завод за ревизија (ДЗР), на ниво на целата држава дури 21 од вкупно 35 подрачни одделенија (60%) воопшто немаат инспектор. Во 2025 година се регистрирани само 14 активни инспектори, што е пад за 18% во споредба со претходниот период.
-21 подрачно одделение (60%) воопшто нема инспектор, што претставува висок ризик за ефикасноста на инспекцискиот надзор. За постигнување на задоволително ниво на покриеност со инспектори се потребни дополнителни 56 инспектори, стои во извештајот на ДЗР.
Дополнителен товар врз противпожарната заштита претставува неповолната и критична состојба во Територијалните противпожарни единици (ТППЕ) во општините. Покрај недостигот од инспекциски надзор на терен, самите оперативни единици се соочуваат со застарен возен парк и значаен дефицит на пожарникари. Состојбата во ТППЕ – Кочани, каде што има околу 50 отсто од потребниот број професионални пожарникари доволно илустрира за каков недостиг се работи.
Дополнително, ТППЕ – Кочани, заедно со уште 12 територијални противпожарни единици од поголемите градови, имаа статус на републички сили за заштита и спасување, односно се вклучени во оперативното делување при гаснењето пожари на целата територија на државата.
Пополнетоста со оперативен кадар во противпожарните единици во регионот достигнува едвај 45% од предвидените работни места, додека просечната старост на противпожарните возила е 32 години, при што дел од возилата на терен се стари дури и до 56 години.
Недостигот од ресурси и кадар ги става сите ТППЕ во исклучително тешка положба при справувањето со комплексни шумски и урбани пожари, со оглед на тоа што финансирањето преку општинските буџети и наменските дотации е ограничено.
Поради овие дефицити, заштитата на заедниците во Кочани и регионот во голема мера останува зависна од меѓуопштинска испомош, доброволни противпожарни друштва и најавените меѓународни проекти за модернизација.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
