Мурал со фолклорни мотиви на жетварки, ориз и делови од грбот на Кочани е насликан на еден од потпорните ѕидови на улицата „Димитар Влахов“, на влезот во градот. Се работи за ликовно видување на академскиот уметник м-р Дејвид Стоилковски од Куманово со кое тој се претставува пред јавноста на поинаков начин од вообичаените изложби.
Ѕидот што претходно се користеше за лепење политички плакати пред секои избори, а што потоа го нагрдуваше просторот со остатоците на пропагандниот материјал, сега има поинаков и облагороден изглед.
Авторот на муралот истакнува дека негова определба се фолклорните мотиви, иако е потребно време и труд идејата да се пренесе на ѕидната површина.
-Мотив ми беше да се застапат сите битни елементи по кои се препознава Кочани, а на ѕидот се насликани жетварки и ориз што е претставен во поблизок кадар. За да не биде сè реалистично на муралот, пробав да вклопам и делови од грбот како составен дел од композицијата, а тие се пронаоѓаат во некои одредени делови, истакна Стоилковски
Авторот на уметничкото дело најави дека се подготвува сличен мурал да наслика и на потпорниот ѕид на крстосницата од улиците „Димитар Влахов“ и „4 Македонска бригада“, што се наоѓа во близина на веќе изработениот мурал.
-И вториот мурал ќе биде поврзан со фолклорот, оризот и македонските карактеристики, а ќе биде насликан на неколку стотини метри подалеку од сегашниот. Така едниот со другиот ќе соодветствуваат и ќе бидат една целина, додава Стоилковски.
Изработката на муралите на ѕидовите во Кочани е со поддршка од Локалната самоуправа, а претходно Стоилковски работел и на слично уметничко дело на ѕидот од булеварот „Тодосија Паунов“, кај популарните Атомски згради. Освен тоа, негови мурали веќе можат да се видат и во Струмица, Прилеп, Скопје, Куманово, Штип, Виница, Крива Паланка и други градови во државата.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
