Источниот и Североисточниот регион се најнапред во државата во процесот за регионално решавање на управувањето со комуналниот отпад, за што е предвидена изградба на централна станица за негово собирање и третман.
Од Министерството за животна средина и просторно планирање потврдија дека жителите од двата региона можат да очекуваат први да добијат современо решение за депонирање на отпадот и соодветна заштита на природата.
-Во финална фаза на подготовка е тендерското досие и очекуваме до крајот на годината или најдоцна во јануари да биде објавен јавниот повик за изградба на централната станица кај Свети Николе и за претоварните станици. Станува збор за финансиски пакет од околу четириесетина милиони евра, само за Источниот и Североисточниот регион. Тој опфаќа набавка на опрема, канти, контејнери и возила, што беа обезбедени пред три години, потоа затворање на општинските депонии. Првиот лот, односно првиот тендер е во фаза на имплементација, дел од депониите почнаа да се затвораат, односно отпадот од помалите се пренасочува кон поголемите депонии, сè до нивно финално затворање. Ова е прв посериозен проект за управување со отпадот во државата, а ќе продолжиме и со другите региони со новиот заем од Европската банка за обнова и развој, со што ќе бидат иофатени уште пет региони во државата, истакна Каја Шукова, министерка за животна средина и просторно планирање.
Затворањето на општинските депонии е во рамки на проектот за изградба на регионалниот Центар за управување со отпад за Источниот и Североисточниот регион што почна во октомври минатата година. Помалите локални самоуправи веќе презедоа соодветни активности со кои затворија поголем дел од нелегалните депонии на своите територии.
Паралелно со проектот за регионалните депонии во државата, неодамна од ресорното министерство информираа дека е почната иницијатива за формирање комунална полиција. Таа ќе работи на терен, а ќе треба да помогне превентивно, но и репресивно да се менуваат навиките на населението во однос на зачувувањето на животната средина.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
