Повеќе од двесте деца денеска беа дел од Бадниковата поворка во Кочани. Низ улиците во градот се пееше песната „Вечниот Бог“, а жолтите ѕвездички што ја симболизираат Витлеемската ѕвезда ги носеа дечињата и го навестија Христовото раѓање.
Малите бадникарчиња тргнаа од храмот „Св. Великомаченик Георгиј“ и по улицата „Димитар Влахов“ се упатија кон зградата на Општина Кочани. Таму градоначалникот Љупчо Папзов им подели скромни подароци и им посака многу здравје и среќа во животот. Потоа поворката помина долж улицата „Кеј на Револуцијата“ до Паркот на Револуцијата каде заврши литијата.
-Продолжуваме со убавата традиција, односно тоа се Бадниковите поворки каде нашите најмили дечињата со ѕвездички во рака пеејќи достоинствени христијански песни, продифилираа низ улиците во Кочани и ја соопштуваат веста за Христовото рождество. Глетката е навистина прекрасна, бевме пречекаани и од градскиот татко, Љупчо Папазов кој што на сите дечиња им подели скромни подароци. На дечињата им беше поделен и молитвен поздрав и благослов од неговото високопреосвештенство митрополитот брегалнички г. Иларион. На сите верници и посакувам мирен Божик, со радост во срцата и достоинствено да го пречекаат празникот, истакна Димитар Арсовски, свештеник од Храмот „Св. Великомаченик Георгиј“.
Бадниковата поворка во Кочани се релизира веќе неколку години, а е во организација на храмот „Св. Великомаченик Георгиј“. Освен во Кочани Бадникови поворки се одржаа и во соседните општини кои се под Брегалничката епархија.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
