Превозот на ученици во СОУ „Гошо Викентиев“ не се реализира целосно затоа што за дел од релациите не е обезбеден превозник. Иако јавниот повик за избор на давател на услугата бил спроведен навреме, поради неповолните цени што биле понудени, постапката не е целосно комплетирана, па се повторува.
Обезбедувањето посебен линиски превоз за учениците е законска обврска за основните и средните училишта, но на почетокот на оваа учебна година во „Гошо Викентиев“ сè уште не се во функција релациите Теранци – Спанчево – Бање – Кочани, Долни Подлог – Мојанци – Горни Подлог – Кочани, Оризари – Кочани, како и градскиот превоз на осум стојалишта. Покрај СОУ „Гошо Викентиев, корисници на услугата се и СОУ „Љупчо Сантов“, како и основните училишта „Св. Кирил и Методиј“ и „Никола Карев“.
На 34. седница на Советот на Општина Кочани беше поставено советничко прашање зошто не е обезбеден бесплатниот ученички превоз, со оглед што тоа влијае врз редовноста и присутноста на настава кај учениците.
-Веќе две недели тече наставната година, зошто учениците од „Гошо Викентиев“ немаат организиран превоз? Значи, практично не се држи настава во училиштето, учениците ја бојкотираат наставата. Празно е училиштето, само наставници внатре има, истакна Жаклина Филипова Свеќароска, член на Советот на Општина Кочани.
Од раководството на техничкото средно училиште потврдија дека ученичкиот превоз не се реализира целосно, но дека причината за тоа е објективна, иако не влијаела врз реализацијата на наставниот процес.
-Настава има, проблем е со тие неколку линии за превозот, тоа е тендерска процедура, поништена е поради повисоките суми што се ставени од операторите. Сега има распишано нова постапка, а од тие 14 мислам дека се, за 9 се потпишани договори и редовно се возат. Другите делови се поништени затоа што ние имаме дадено колкави суми во вредност како буџет имаме, а тие имаат дадено многу повеќе и законски не можеме да склучиме договор, поништуваме и нов оглас распишуваме, истакна Спирко Златков, в.д. директор на СОУ „Гошо Викентиев“.
Вкупната сума што е предвидена да се плати за четирите линии е проценета на нешто повеќе од 5 милиони денари, при што најголем дел отпаѓа на релацијата во градот, односно од постојките Валог, Бејрут, Роза Петрова, Белски Пат, Бавчалук, Плоштад, Автобуска станица до училиштaтa и обратно.
Во моментот тече рокот за повторениот јавен повик за избор на превозник, а понудите треба да се поднесат најдоцна до 3 октомври. Тоа значи дека ако целата постапка помине без проблеми и се обезбеди давател на услугата кој ќе понуди прифатливи цени, превозот на учениците на четирите линии би можел да профункционира во втората половина на идниот месец.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
