Средното стручно училиште „Гошо Викентиев“ го отвори новиот тренинг центар за PLC програмирање, како заедничка иницијатива со компанијата „Амфенол Технолоџи Македонија“, а со поддршка од УСАИД во рамки на активностите „Партнерства за економски раст“ и „Млади кои активно создаваат можности“.
Тренинг центарот e опремен со најсовремените програмабилни логички контролери (PLC) од програмата на SIEMENS, најразлични видови сензори и целосна релејна и пневматска опрема. Покрај новата опрема, воспоставена е и електрична и пневматска инсталација и маси кои создаваат реален работен простор.
-Оваа инвестиција ќе им овозможи на нашоте ученици да се стекнат со знаења и вештини од областа на PLC програмирањето, а по завршувањето на образованието и можност за вработување во приватниот сектор. Од друга страна, приватниот сектор ќе добие веќе обучена висококвалификувана работна сила која е дефицитарна, со што ќе се влијае за зголемување на продуктивноста во самите компании, но и место каде нивните вработени ќе можат да се доусовршат и стекнат нови знаења за PLC програмирање, истакна Владо Симеонов, в.д. директор на СОУ „Гошо Викентиев“.
Соработката меѓу „Амфенол Технолоџи Македонија“ и средното училиште беше воспоставена пред четири години со отворањето на тренинг центар за кремпирање и лемење, а продолжува со нови проекти во кои се опфатени учениците.
-Новиот тренинг центар е продолжување на долгогодишната соработка помеѓу нашата компанија, средното стручно училиште и УСАИД, а тој е опремен со најсовремени PLC уреди. За нас како компанија овој проект е важен затоа што во производството се користат програмабилни логички контролери кои служат за автоматизација на машините. Дополнително, во рамки на оваа иницијатива професори од училиштето и вработени од компанијата учествуваа на обука за користење на оваа опрема во Тузла, Босна и Херцеговина и станаа сертифицирани Siemens PLC програмери, истакна Сашко Наков, директор на компанијата „Амфенол Технолоџи Македонија“.
Претставниците од канцеларијата на УСАИД ја поздравија соработката помеѓу приватниот сектор и образовните институции, а на учениците кои ќе ја користат опремата им порачаа дека тие се клучот за идниот развој на земјата и по завршувањето на образованието ќе имаат и повеќе можности за вработување.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
