Комуналното јавно претпријатие „Водовод“ од Кочани повторно бара согласност од Советот на Општината за покачување на цените за водоснабдување и канализација, што во просек ќе изнесува околу една третина во однос на актуелните цени.
Одлуката за промена на тарифата на дел од услугите, што ја донел Управниот одбор на претпријатието во април годинава, ќе направи значителeн пораст во однос на веќе утврдениот тарифник за периодот 2021-2023 година. Покачувањето на цените се однесува и за домаќинствата и за комерцијалните потрошувачи, односно за правните лица.
Најмало поскапување од десет отсто се бара за водоснабдувањето на домаќинствата, додека кај правните лица тоа треба да изнесува 13,3 отсто, а за јавната потрошувачка 20 отсто. Наспроти тоа, побарана е согласност за драстичен пораст на цените за собирањето и одведувањето на отпадните води, при што за домаќинствата треба да биде 60, а за правните лица 75 отсто. Дополнително, со измените во тарифникот се планира цената на услугата за пречистување на отпадните води да порасне за 14,7 отсто и за двете категории корисници.
Управниот одбор на „Водовод“ не ги наведува причините поради кои го бара покачувањето на цените во однос на веќе утврдените, а во претходниот период тоа го оправдуваше со поскапувањето на електричната енергија и другите трошоци во работењето на претпријатието.
Согласност за одлуките за измена на тарифникот за услугите беше побарана и на седницата на Советот на Општина Кочани минатиот месец, но тогаш мнозинството советници беа против или воздржани, па бараното поскапување на помина. Истото барање повторно е на дневен ред на 30. седница на Советот, што е закажана за в среда, 12 јули.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
