Учениците во подрачното основно училиште „Никола Карев“ во Тркање добија мини спортска сала во која во текот на зимскиот период ќе се одржува наставатa по физичко и здравствено воспитување.
Се работи за просторија што била неискористена и слободна, а која со ангажман на вработените и со дополнителна поддршка е опремена со спортски реквизити.
-Имавме донација и јавно сакам да се заблагодарам на директорот и Училишниот одбор на СОУ,,Љупчо Сантов” што ни доделија три пинг-понг табли што ги репариравме и учениците ќе можат да ги користат. Исто така, имавме и други реквизити во централното училиште, а не ги користевме со оглед што имаме исти во училишната спортска сала, ги пренаменивме за подрачните училишта. Досега, во зимските денови учениците часовите по физичко ги одржуваа седејќи во училница, учејќи за спортовите, за димензиите на игралиштата, за историјатот на спортските игри, сега ќе имаат можност да рекреираат, односно вистински да спортуваат. Презадовлни сме што дечињата беа радосни кога ја видоа просторијата, а со тоа и нашиот ангажман се вреднува, истакна Александар Андов, директор на ОУ „Никола Карев“ – Кочани.
По опремувањето на мини спортската сала во Тркање, слична активност во текот на наредната недела ќе се спроведе и во подрачното училиште во Грдовци.
-Иста сала со исти реквизити ќе бидат поставени во училница што исто така беше напшуштена и се користеше за сместување дрва за огрев. Го оспособивме подрумот за дрвата, а училницата е исчистена, средена, сега се варосува. Реквизитите ќе ги однесеме идната недела, со што ќе овозможиме и учениците во подрачното училиште во Грдовци, покрај спортувањето надвор, да користат сала за часовите по физичко и здравствено образование, додава Андов.
Покрај опремувањето на мини спортските сали во подрачните објекти, во тек се активности за подoбрување на условите во централното училиште во Кочани, кое меѓу другото ќе добие голем паркинг простор.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
