Општините од Источниот и Североисточниот регион постигнаа договор за значително намалување на првично бараниот износ за финансирање на заедничкото јавно претпријатие „Екоисток Североисток“ – Свети Николе, кое ќе управува со идната регионална депонија.
Наместо првично предложените 60 денари по жител, Советите на Општините донесоа одлука за издвојување на 10 денари од глава на жител за тековно работење и одржување на претпријатието.
Оваа одлука следува по низа заеднички состаноци на градоначалниците од двата региона, каде што се дефинираше начинот и динамиката на функционирање на новата регионална депонија која ќе биде сместена во Мечкуевци кај Свети Николе.
-Првичниот предлог на директорот на регионалното претпријатие беше неприфатлив за локалните буџети. Ни беше побарано по 60 денари од жител за да може да почне да функционира тоа јавно претпријатие. Јас констатирав дека нашата Општина не е во состојба да плати толку високи финансиски средства и после тоа излезе дека и другите општини не се согласуваат, па предложив тоа да биде 10 денари по глава на жител за овој период додека да се стави во функција јавното претпријатие. Овој предлог беше едногласно прифатен од сите градоначалници, по што беше преточен во одлука која општинските Совети треба да ја изгласаат, истакна градоначалникот на Општина Чешиново-Облешево, Јорданчо Костадинов.
Секретарот на Општина Виница, Дарко Јангелов потврди дека секоја општина ќе го носи својот дел од финансискиот товар според бројот на жители од последниот попис.
-Градоначалниците се договорија од општинските буџети да биде финансирано тековното работење и одржување на заедничкото јавно претпријатие. Така, секоја општина ќе издвојува од буџетот по 10 денари од жител според последниот попис од 2021 година. Општина Виница, која брои нешто над 14.000 жители, оваа обврска ќе изнесува околу 140.000 денари годишно, истакна Јангелов.
Според најавите, наскоро треба да започне постапката за јавна набавка за изградба на депонијата. Процените се дека до септември оваа година ќе биде избран изведувач и ќе започнат градежните работи, со цел регионалната депонија да биде ставена во целосна функција во текот на наредната година.
Заедничкото претпријатие „Екоисток Североисток“ е веќе формирано, а со новите измени се редуцира и бројот на членови во Управниот и Надзорниот одбор заради поефикасно управување.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
