По повод 15 Октомври – Меѓународниот ден на белиот стап, во Центарот за млади „Гнездо“ во Кочани беше отворена изложба на уникатни рачни изработки од Славица Димитрова.
Димитрова, која е член на Здружението на слепи и слабовидни лица, пред присутните ги презентираше своите изработки од накит и декоративни свеќи со различни мотиви.
Настанот беше дополнително збогатен со поетско читање, а неговата главна цел беше подигнување на свеста за потребите, правата и можностите на лицата со оштетен вид, како и поттикнување поголемо разбирање, почитување и поддршка од страна на целата заедница.
Во своето обраќање пред присутните, Славица Димитрова се заблагодари за поддршката и го сподели својот творечки пат, објаснувајќи дека нејзината креативна работа започнала преку проект во Здружението на слепи и слабовидни лица, по што од изработка на накит се пренасочила кон креирање декоративни свеќи.
-Сакам да се заблагодарам за вашето присуство и за поканата која ја прифативте да бидете дел од овој настан. Најпрвин започнав со изработка на накит преку претходен проект во Здружението на слепи и слабовидни лица, од каде што добив инспирација и идеја да продолжам да работам. Потоа се пренасочив на изработка на декоративни свеќи, бидејќи во нив повеќе се пронаоѓам и за пократок временски период можат да се направат повеќе изработки. Како слепо и слабовидно лице сакам да бидам еден вид мотивација за сите други лица кои имаат каков било хендикеп – да не го гледаат тоа како пречка, да не се срамат и едноставно, доколку имаат некаков талент, да се пронајдат и да го работат сето тоа, истакна Димитрова.
Светскиот ден на белиот стап за првпат официјално е прогласен во 1964 година во САД од страна на претседателот Линдон Б. Џонсон и е посветен на подигање на јавната свест за правата, потребите и секојдневните предизвици со кои се соочуваат слепите и слабовидните лица во општеството.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
