Студентите на Универзитетот „Гоце Делчев“, кои секојдневно патуваат на релацијата Кочани – Штип – Кочани, се соочуваат со сериозни проблеми, несигурност и високи трошоци за меѓуградскиот автобуски превоз.
До редакцијата на ИПТВ Канал 8 тие испратија реакција во која посочуваат дека изминатиов период се наоѓаат во исклучително незавидна ситуација поради неколку клучни проблеми со превозот.
Студентите наведуваат дека при секој контакт со превозниците и локалните агенции во Кочани, добиваат различни и неточни информации за тоа кој ги преземал автобуските линии и кој го добил тендерот.
Исто така, истакнуваат дека месечниот билет за оваа релација достигнал дури 5.000 денари, додека цената за дневен повратен билет изнесува до 500 денари, што претставува неподнослив товар за студентскиот буџет.
Освен тоа, понудените термини за тргнување и враќање се сосема неповолни и им одземаат цел ден на студентите за само неколку часа предавања. Како пример се посочува поаѓањето во 6 часот наутро од Кочани, додека првите термини за враќање од Штип се во 13 часот или дури во 20 часот навечер.
Овој проблем директно засега голем број студенти, но и работници од регионот кои секојдневно патуваат меѓу Кочани и Штип. Отежнатиот меѓуградски превоз се појави по прекинот на работењето на компанијата „Авто Атом“ која одржуваше дел од линиите на оваа релација.
Редакцијата на Канал 8 ги достави сите прашања до надлежните во Општина Кочани со цел студентите да бидат заштитени од отежнатите услови за превоз и од неоправдано високите цени, а очекува соодветен одговор.
*насловната фотографија е со креирана содржина заради илустрација
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
