Учениците во прво одделение во ОУ „Малина Попиванова“ добија две новореновирани и опремени училници во кои веќе ја следат наставата и имаат целодневен престој.
Просториите се во објектот неспоредно до училишната зграда, при што заменето е осветлувањето и таванот со површина од околу 120 квадратни метри, реновирани и бојадисани се внатрешните ѕидови, поставени се нова влезна врата и прозорци од ПВЦ материјал, а преуреден е и санитарниот јазол со што се обезбедени соодветни услови за изведување на наставниот процес.
Реконструкцијата на просториите била планирана да заврши пред почетокот на учебната година, но поради објективни причини градежните и инсталатерски работи се пролонгирале извесен период.
-Малку задоцнивме со целосното реновирање на училниците бидејќи имавме голем проблем со таванот, ни се случи мала хаварија, односно таванот се одлепи од горните држачи. Тоа се случи при крајот на август и бевме принудени комплетно да ги реновираме и сето ова го направивме со сопствен буџет. Заменети се држачите и таванот, а дополнително се направи и внатрешно уредување за сето тоа да изгледа убаво. Од оваа учебна година и нашето училиште има продолжен престој за дваесетина ученици, а пред и после часовите ги прима наставничка која работи со нив, истакна Благој Петров, директор на ОУ „Малина Попиванова“.
Поддршка во реконструкцијата на просториите дала и Општина Кочани, а благодарност од училиштето упатија и до изведувачот на градежните работи за ефикасната и квалитетна работа.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
