По дводневна интервенција екипите на КЈП „Водовод“ го санираа дефектот на главната доводна линија за водоснабдување на корисниците од високата зона во Кочани и во селото Бели. Оштетувањето на цевката, што се случи во саботата попладне, го предизвика надојдената вода во коритото на Кочанска Река, во близина на градскиот пазар, каде што поминува цевководот. Од насобраниот нанос и отпад што го носела водата пукнало едно од металните колена на цевката, по што дојде до прекин на снабдувањето со вода за пиење.
За да можат да интервенираат екипите на „Водовод“, градежна механизација на приватната компанија „Калина“ во понеделникот попладне го премести текот на реката на спротивната страна со што се обезбеди пристап до местото каде што настанал дефектот. Поправката траеше десетина часови, по што оштетената цевка беше заменета, а водата пуштена во водоводната мрежа.
Поради големиот дефект четири дена без вода останаа жителите од населбите Драчевик и Варница, потоа од улиците „Скопска“, „Охридска“, „Бел Камен“, „Коста Рацин”,.„Ударничка”, „Шукри Шаин” и „14 Бригада” во Кочани, како и сите корисници од селото Бели.
Немаше проблеми во водоснабдувањето на клонот на градинката во Текешински Лозја со оглед што објектот е приклучен на мрежата од средната зона.
Во меѓувреме, додека траеше дефектот Територијалната противпожарна единица и Доброволното противпожарно друштво од Кочани, на неколку пунктови во градот со цистерни носеа техничка вода за граѓаните.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
