Академскиот уметник Дејвид Стоилковски од Куманово го почна сликањето на вториот мурал на влезот во Кочани, на потпорниот ѕид кај крстосницата на улиците „4 Македонска бригада“ и „Димитар Влахов“. Се работи за второ уметничко дело што тој го прави на оваа локација, а со тематика поврзана со македонскиот фолклор и карактеристиките на кочанскиот регион.
-Од претходниот мурал може да се види дека има елементи што се препознатливи за Кочани како што е оризот, жетварките и делови од грбот на општината, тие теми се поврзуваат и овде. На овој мурал дополнително ќе ја има црквата во Кочани и дел од Споменикот на слободата што го изработил Чемерски. Ќе има и човек кој жнее ориз, така што овие два мурали ќе бидат како диптих, како да се споени, иако се оддалечени стотина-двеста метра еден од друг, но тоа е таа тематика, истакна Стоилковски.
Со оглед што се работи за двојно поголема површина од муралот што претходно беше насликан на потпорниот ѕид кон улицата „Григор Прличев“ над стадионот, за сликање на овој мурал Стоилковски има мала помош од својот татко и од пријател од Кочани.
-Претходниот мурал го завршив за два дена, за овој ќе ми биде потребно малку повеќе, но ќе видиме. Зависи од временските услови, многу е топло, а има и други околности што се битни. Во разговори сум со одговорните во Општината да се направи и друг мурал, некаде во центарот на градот, но навистина да биде на височина за да е повпечатлив и видлив од далеку, додаде Стоилковски.
Пред да се определи професионално да се занимава со сликарството, Стоилковски пред десетина години, како средношколец почнал прво со цртање графити, а пред неколку години и со мурали. Негови дела можат да се видат и во другите македонски градови, како и во САД, Србија и во Босна и Херцеговина. Сепак, најдраг му е муралот на едно основно училиште во родното Куманово, а најбитен оној за магистерскиот труд што го изработил на Факултетот за ликовна уметност во Скопје.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
