На земјоделските површини во селото Мојанци денеска се изврши традиционалното зажнејување на ориз во рамки на манифестацијата „Денови на кочанскиот ориз“.
Жетвата на рака, со срп, е навраќање на традицијата, а првиот сноп го ожнеаа овогодишната жетварската убавица, нејзините две придружнички, како и членови на Здружението на пензионери од Кочани. Веднаш по зажнејувањето се напрви и вршидба на гумно.
На настанот присуствуваа повеќе делегации од државата и странство. Директорот на Агенцијата за финансиска поддршка во земјоделството и руралниот развој, Ивица Бачовски истакна дека работата на оризопроизводителите е широко препознаена од нивна страна и дека постојано работат на унапредување на земјоделството.
-Оризопроизводителите во минатиот период се соочуваа со големи предизвици, а ние со големи напори се потрудивме да се решат проблемите. На сите оризопроизводители им посакувам успешна жетва, а нормално и државата со своите институции е тука да помогне, истакна Бачовски.
На настанот во Мојанци беше доделено и признанието за најуспешен земјоделец, а годинава таа му припада на Митко Стојанов. Од Општина Кочани тој ќе добие парична награда во износ од 60 илјади денари.
-Очекуваме плодна година, но на почетокот се соочивме со климатски промени и некои земјоделски површини не беа обработени, и покрај сите проблеми ние земјоделците очекуваме плодна жетвена сезона. Очекуваме и добра цена, а тоа е најбитно за земјоделецот. Реалната цена за оризот оваа година би била 45 денари, а помалку од таа сума е неисплатливо, односно како земјоделец нема да можам да егзистирам. Оваа година се соочивме и со болест на оризот и затоа апелирам до Институтот за ориз до Земјоделскиот факултет и останатите надлежни институции наредната сезона да ја почнеме поспремни, истакна Митко Стојанов, најдобриот оризопроизводител за 2022 година.
Денешната манифестација беше збогатена со настап на учениците од музичкото училиште „Ристо Јуруков“ и фолклорниот ансамбл „Љупчо Сантов“ од Оризари. Големиот број гости уживаа и во традиционалната кочанска храна, како а и во ракотворбите на вредните домаќинки.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
