КЈП „Водовод“ бара согласност од Советот на Општина Кочани за покачување на цените за водоснабдување и канализација, што во просек ќе изнесува околу 15 отсто во однос на актуелните цени.
Одлуката за промена на тарифата на услугите пред неколку дена ја донел Управниот одбор на претпријатието и се однесува на тарифникот за периодот 2024-2026 година. Покачувањето на цените треба да ги опфати и домаќинствата и комерцијалните потрошувачи, односно правните лица.
Поскапувањето е во рамки на одобрението од Регулаторната комсија за енергетика, која оценила дека максималното покачување на цената на водата за пиење во домаќинствата може да изнесува до 17,28%. Сепак, од „Водовод“ се одлучиле да не го искористат максимумот, па се предлага новата цена да изнесува 52,50 денари за кубен метар. Предложеното поскапување за правните лица, односно за претпријатијата и институциите е нешто повисоко, ќе изнесува околу 15 отсто, односно фирмите и установите би требало да плаќаат по 62,50 денари за кубик вода.
Покрај поскапувањето на водата за пиење, се бара согласност и за надоместокот за канализација и пречистување на отпадните води. Според одлуката на УО на „Водовод“ домаќинствата ќе треба да плаќаат по 23,50 денари, а правните лица по 24,50 денари за метар кубен отпадна вода, што е покачување за една четвртина. За пречистување на отпадните води пак, се бара покачување од 33%, односно од сегашните 14,30, надоместокот да изнесува 20 денари за метар кубен, и за домаќинствата и за правните лица.
Согласност за одлуките за измена на тарифникот за услугите беше побарана од Советот на Општина Кочани и во средината на минатата година, но тогаш мнозинството советници беа против или воздржани, па бараното поскапување на помина. Истото барање повторно е на дневен ред на 43. седница на Советот, што е закажана за в четврток, 22 февруари.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
